कोर्टी, पंढरपूर: संपूर्ण देशाला नव्हे तर संपूर्ण विश्वाला कोरोना रोगाने फक्त त्रस्तच नव्हे तर अनेक परिवारांना अक्षरशः उध्वस्त केले. अशा अतिशय वाईट व धोकादायक परिस्थितीत अखंड व कायम सेवेत राहून असंख्य रूग्णांना जीवनदान देणा-या देशातील असंख्य देवदूत अर्थात डॉक्टर व आरोग्य सेवकयांचा सन्मान करणे ही देशातील प्रत्येक नागरिकाची एक सामाजिक जाणीव या भूमिकेतून जबाबदारी आहे. ही सामाजिक जाणिव व जबाबदारी पूर्ण करण्यासाठी नेहमीच एक पाऊल पुढे टाकणारी संस्था सिंहगड पब्लिक स्कूल कोर्टी पंढरपूर यांनी सर्व शिक्षक व शिक्षकेतर कर्मचारी यांच्या वतीने गादेगाव येथील आरोग्य केंद्रावर जाऊन सर्व आरोग्य कर्मचारी यांचा गुलाबपुष्प देऊन सन्मान केला. यावेळी आरोग्य विभागप्रमुख डॉ. अनिसा तांबोळी, श्री. सुभाष तनमोर व त्यांचा सर्व कर्मचारी परिवार उपस्थित होता. सिंहगड पब्लिक स्कूल च्या प्राचार्या स्मिता नवले, मुख्याध्यापिका स्मिथा नायर यांनी हा सत्कार करून आभार व्यक्त केले.
